مواقف طفولية

السلام عليكم،،

بالامس واللي يصادف تاريخ 14/11/2017 كان زواج اختي، وهذا يعني بأن بيتنا نقص فرد جديد من أفراده .. كل هذا جيد، لكن الغير جيد بأني أشعر بكآبة حادة جدا بسبب الفراغ والهدوء اللي احسه في البيت ..

في السابق كنا 11 فرد في البيت مع أمي وأبوي، ما أقول بأني عشت حياة مثالية مع الكل في الصغر لكن خلينا نسترجع ذكريات عائلية وبعدها نقرأ ذكرياتكم ..

طبعا ترتيبي السابع، يسبقني ستة افراد ثلاث اولا وثلاث بنات ومن بعدي بنت وولد .. كانت حياتي مع اخواني الكبار أشبه بجحيم وفي المقابل انا كنت مستفز بشكل لا يوصف ومالومهم حقيقة على تعنيفهم لي .. كنت اخرب عليهم حرجاتهم ودشراتهم واخلي الوالد بالغصب يخليهم ياخذوني معاهم رغم اني صغير جدا ومو مناسبة لي طلعاتهم، فالمهم كان يضربوني ضرب مبرح .. فعليا وحرفيا اذكر مرة واحد منهم مسك راسي وحطه عالارض وقعد يزحف براسي على كامل الارضية .. ومرة اكلوني دوا لا هم عارفين ايش هو هذا الدوا ولا انا .. وارغموني اكله ودموعي تسيل شلالات .. كان المخرج في الاخير اني انجو من هذي الحياة، بأني اطلب لجوء سياسي لاخواتي .. طبعا هذا اللجوء مايعني بأني ما انضربت وتعنفت من اخواني من بعدها، لكن اللي حصل بأن الامر صار مزيج مابين الكرف والعنف .. يوم انضميت لاخواتي أصبح الوضع عندهم متوازن، يعني صارو اربعة اشخاص ويقدرو يقسمو اعمال البيت على كل اثنين مع بعض .. فكنت انا واختي الكبيرة فريق، واختي اللي تزوجت بالامس واختي اللي اصغر منها فريق .. كان يوم غسيل الصحون علي انا واختي الكبيرة، واليوم الثاني عالاثنين الثانيين وهكذا، وكنا كل يوم اثنين وخميس ننظف البيت تنظيف شامل .. واقصد بهذا الاحواش الخارجية وكل شي .. الى ان جاء اليوم الموعود .. وهو اليوم اللي من بعدها سلبت مني متعة الطفولة والاستمتاع بها .. كان يوم خميس، وانا واختي الكبيرة نظفنا جزئية الحوش المخصصة لنا .. وخلصتا منها الحمد لله، وبعد ما انتهينا .. الوالد كلم اخوي الكبير وقاله يقص الاطراف الزائدة من الشجر لانه صار مشوه لمنظر الحوش .. طيب يا اخي الكريم، ويا والدي العزيز .. تونا منظفين الحوش حرام والله 🙂 .. عاد وانتم عارفين بأني معنف ماينفع اتكلم، حصل اللي حصل والحوش انخرب مرة ثانية  .. وجات اختي الكبيرة وقالت هيا يامحمد ننظف الحوش ثاني .. هنا انا تمردت، وليتني كنت ماكل تبن وسمعت كلامها ونظفت الحوش .. رفضت رفض قطعي وبعد المفاوضات المطولة معاها توصلت هي لخيار عقوبة صارم في حقي .. وكان اني اغسل المواعين لعشرة اسابيع متتالية دون انقطاع، سواء كان دور فريقنا ولا دور الفريق الثاني .. وطبعا .. وانا طيب زي المحترمين سمعت الكلام وبدات في رحلة غسيل المواعين، الاسبوع الاول .  الثاني ... الثالث ... الرابع ..  الخامس وبديت اتعب جدا .. ودخلت في السادس، ويوم وصلت السابع حصل موقف ضايقني جدا وشعرت بأني لو ماسويت شي لنفسي حيال هذا الموضوع .. فراح تسلب مني حياتي الطفولية بالكامل ولا عاد يبقى لي شي .. كنت العب بليستيشن مع اخوي واقارب لنا، وفجأة اختي تسحبني من بينهم تقولي هيا عالمطبخ .. المواعين .. والله انا وقتها اكلني قلب اكل كنت ابغى العب، واختي الكبيرة الله يهديها من يومها والى الان هي صارمة صرامة في الانظمة والقوانين اللي تحطها، لذلك هذاك اليوم رحت مكروه وانا اغسل الصحون وادور في عقلي على طريقة تخلصني من هذا العذاب .. وبعد تفكير طويل وعناء .. جات في راسي الفكرة بأني اشتكي لابوي واقوله عن السالفة حتى يشوف حل في حياتي الضائعة .. جا الوالد هذاك اليوم وعلى طول رحا جلست جلسة مصلحة عنده وقلتله ابغى اقول لك عن موضوع وفاتحته عن سالفة الشجر قبل سبعة اسابيع وايش صار والحال اللي صارتلي بعدها .. الزبدة، انه نادى اخواتي وهزأهم قدامي كلهم .. ومن يومها الحمد لله رجعت حياتي طبيعية مع المواعين والتنظيف واشغال البيت .. طبعا المواقف كثيرة جدا، احس اني كتبت بزيادة جدا، لكن هذا كان سبب من الاسباب اللي اتمنى فيها بأن البيت يفضى وتصير فيه خصوصية اكثر وحرية بدل حال الضرب من اخواني والكرف من اخواتي ( طبعا نسيت اوضح بأن حياتي مع اخواتي كانت مرفهة بس كان فيها كرف ) واليوم وبعد ماتحققت امنيتي اراني نادم اشد الندم عليها، يارجل نمت كثير لدرجة اني نمت حتى بدون مكيف من حالة الاكتئاب .. الله يسعدهم ويسعدكم والجميع .. كانت هذي التدوينة هي سبب فكرتي في اني اسوي لي شي خاص .. بحكم رغبتي الملحة في الفضفضة او الكتابة حول هذا .. والاهم من هذا .. بعد ماثرثرت كثير في ذكرى صغيرة لي من الماضي ..

احكوا لنا عن شيء من طفولتكم .. عن مواقفكم مع اخوانكم مع الوالد او الوالدة اللي يخطر في بالكم، وللمعلومية مافي حد للحروف في التعليق، لذلك خذو كامل الحرية في سرد مواقفكم 👏